FOREST OFFICER TE TANAN BUATSAIH ‘Training on Best practices of Forestry’ NEIH A NI
Ni 18.2.2020 khan ni hnih awh tur Forest Officer te tanan buatsaih ‘Training on Best practices of Forestry’ chu FRCBR Conference hall, Bethlehem Vengthlang ah Dr CHM Rao IFS, PCCF & Principal Secretary, EF&CC chuan a hawng.
Hawnna inkhawm hi Pi Lalrammawii Sailo IFS, Principal Forest Training School chuan kaihruaiin Dr K Kire, Addl. PCCF chuan key note address a sawi a. Hawnna thu sawiin Dr CHM Rao chuan, “Building tha tak a ngai angin kan hnathawh in rah tha tak a chhuah theihna tur chuan master plan tha kan nei ngei ngei tur a ni” a ti. Training a tel zawng zawngte master plan siam thei tur a rilru seng turin a sawm bawk.
He hunah hian state chhung leh pawn atanga lokal mithiam ten thupui thlanbik neiin zirtirna an pe a, Mizoram a Ramngaw chereu chhan hrang hrang leh a sut kian dan tur te, Forest plantation hlawk zawk leh tha zawk neih dan tur te, Thingrai chin dan hrang hrang te, Nauban chi hrang hrang leh a venhimna kawnga tan lak dan tur te bakah thildang engemaw zat zir ho a ni a, he hunah hian Forest officer engemawzat bakah Rain Forest Research Institute (RFRI) Jorhat leh FRCBR, Bethlehem Vengthlang atangin mithiam sawm bikte an tel bawk.
