February 6, 2020

SAZA (SEROW) KAH CHUNGCHANGA EF&CC DEPARTMENT THU CHHUAH

Tun hnai maiah vanduaithlak takin mi pakhatin State animal, Saza (Serow) chu diriam taka a kap hlum lai video chu social media a darh chiam mai mai a. He thil hi The Wildlife Protection Act, 1972 bawhchhiatna lian tak a nih avang leh, a hremna pawh na tak a nih avangin Environment, Forests & Climate Change Department chuan a ngai thutak hle a. 

February ni 4 zing khan Pu Lalnunsanga, DFO, Mamit Forest Division chuan he video hi social media kaltlangin a dawng a. DFO, Mamit Forest Division hian Pu C.Lalbiaka, IFS, Conservator of Forest, Wildlife hnenah rang takin a thawn nghal a. Pu Lalnunsanga, DFO, Mamit hian chhui zui nghalin, social media-a video post hmasa bertu chu Lungtiawia a ni ngeiin a hria a. Pu C.Lalbiaka, CF Wildlife pawhin Pu LR Dinga, SP(Crime) leh DSP, CID, Crime te pun nghalin, saza kap lai video chu police te puihnain Lungtiawia, Phulpui chuan Liverpool Fans Group-ah chuan a post hmasa ber a ni tih finfiah a ni zui nghal bawk. Hetianga video post darhtu nia rinhlelhte nihna hriat chhuah a nih takah hian, a tul anga hma la zui nghal turin Pu C.Lalbiaka, CF, Wildlife leh a staff te bakah, Aizawl SP-in police, OC, 2nd OC, ASI leh constable pahnih tir tel bawkin Phulpui an pan nghal a. 

He pawikhawihna kaihhnawiah hian Zomuankima S/o Biakkunga, Phulpui leh Lalthazova S/o Lalbiakdika, Phulpui te chu man an ni. Heng mite rual hian Saza lu, silai leh license leh bike te man nghal an ni bawk. Silai license hi crop protection atana pek a ni a; amaherawh chu crop protection ni lo, dan bawhchhiatna atana hman a nih avangin sorkar chuan silai license hi cancel ngei a tum a ni.

Heng mite hi dt.6.2.2019-ah Aizawl CJM Court-ah hruai nghal an ni a. Magistrate chuan ni 19.2.2020-ah hearing neih leh tura thupek tichhuak nghalin, hearing neih leh hma chuan Central jail-ah Judicial remand-a tang turin thupek a siam nghal bawk a ni.


Saza kah video social media-a a darh phat atangin NGO hrang hrang leh mipuiin thil tisualtute man chhuah a nih theih nan theihtawp an chhuah nghal a. ASEP phei chuan Police station hrang hrangah FIR an thehlut hial bawk. Hemi kawngah hian Environment, Forests & Climate Change Department chuan Aizawl SP (Crime), DSP(Crime) chungah lawmthu a sawi a. NGO leh mi tam tak, heng thil sualtitute man chhuah an nihna kawnga an tawiawmna avangin lawmthu a sawi a ni.


Mizorama Sazate hi kum hmasa lawkah pul hri (Goat pox) avangin za tam tak an thi a. Tunah a thi bangte lo inthlahpungin, zawi zawiin an lo pung ve leh ta hi thil lawmawm tak a ni a. Saza-hi Wildlife Protection Act, 1972-in ramsa a humhalh bik, Schedule-I animal a ni a. Dan bawhchhetute pawh kum 3 atanga kum 7 thleng lung in tan bakah Rs.10000/- (Singkhat) aia tlem lo chawitira hrem theih an ni. Dan bawhchhetu manchhuah kawnga sorkar  tanpuite hnenah lawmman pek theihna dan, “The Mizoram Rewards for Detection of Forest and Wildlife Offence Scheme, 2019” hmangin Environment, Forest & Climate Change Department-in lawmman a pe thin a ni.  


Hetiang dan bawhchhiatna lakah fihlim tur leh, kan rama nungchate zalen taka an chen zel theih nan Environment, Forests & Climate Change Department chuan mi zawng zawng a ngen a. Social media emaw, khawi hmunah pawh dan bawhchhiatna a awm tih hria chuan rang taka thuneitute hriattir nghal turin Environment, Forest and Climate Change Department mipui tawiawmna a ngen a ni. 


Issued In Public Interest by Environment, Forest & Climate Change Department, Mizoram